اثنين سمعهم ثقيل جداً واقفين على محطة الاتوبيس ودار بينهم الحوار التالي
الأول : الاتوبيس ده بيروح مــصر الجديدة؟
الثاني : على الحديدة !!... ليه انت طالب احسان ؟
الأول : بذرة الكتان !! لا ..دي تلاقيها عند العطار
الثاني : جزار!! اه ..قوللي كده .. عايز تشتري لحمة
الأول : معك حق.. الدنيا زحمة ..علشان ده ميعاد خروج الموظفين
الثاني : نور الدين !! لا والله .. ماعرفوهش
الأول : ما بتشربوش!! ليه ..كفا الله الشر
الثاني : رأس البر !!! ..ده مــصيف هادي
الأول .: عايز تركب للمعادي... دي منطقة جميلة
الثاني : بليلة !! انت شكلك كده جعان
الأول : عيان!!! أي والله .انت باين عليك عيان ..طيب ما تروح للدكتور
الثاني: الحنطور!! ده احسن من الأتوبيس ، وبيوصلني لحد الباب
الأول : هبــــاب !!! وانا اللي كنت فاكرك محترم
الثاني : اتخـرم !! هو مين ؟؟ الأول : عاوز اسـبرين ! ليه انت عندك صداع ؟
الاول : قراع !!! ينهار اسود . ده مرض خطير
ا لثانى : فطير !!! لا والله مش عايز. وبعدين مش بأحب الفطير. تقيل على المعدة وتمنه غالي
الاول: خالي !!! انت تعرف خالي ؟ ده راجل كبير في السن
الثاني : الجن !!! نهارك مش فايت ..انت عليك عفريت .!؟
الأول : لا والله ..ممعاييش.. انت عايز الكبريت ليه ؟ عايز تولع؟
الثاني : أدلع !!! أدلع عليك انت!؟ انت ما تملاش عنيا
الأول : يقبضوا عليا !! ليه !؟
الثاني : انت غريب يا راجل انت..شكلك شحات ، ( يدفعه من القميص) روح اشتغل شغلة تاكل منها عيش
الأول : خيش !!! والله ده صوف انجليزي
الثاني: بنتك زيزي !!! ربنا يخلي...
الاول: أنتاج محلي !!!! ده مستورد
يمر شاويش ... يلفت انتباه الحوار، : بتعمل ايه يا جدع منك له!!!
الاتنين: ايوة يا شاويش ...احنا مستنين الأتوبيس
الشاويش :جواسيس !!!! نهاركم مش فايت ....قدامي على القسم
هذه الرسالة تفيد بأنك غير مسجل فى منتدى همس الربيع للاستاذ/ محمدعبدالله**يسعدنا انضمامك لاسرة المنتدى.. للتسجيل الرجاء اضغط هنــا
